BAALTIS sive BELTIS

BAALTIS, sive BELTIS
Phoenicum Dea, eadem cum Dione ac Venere vel Luna: Vel si diversa est, fuerit Lucifer. Diversas facere videtur Sanchuniathon sive ex eo Philo Byblius, apud Eusebium Praep. Euangel. l. 1. ubi memoratur Astartem et Baaltidem esse sorores; ac illam esse Venerem, hanc Dionem. Utraque ibidem dicitur nupsisse Saturno, sed Astarte quidem, praeter septem Titanidas sive Dianas etiam mares peperisse narratur, Cupidinem Amoremque: ex Dione autem prognatae solae perhibentur puellae. Verum aliter de isto Graeci ac Romani. Quippe Orpheo Argonaut. dicitur Διοναῖα Α᾿φροδίτη, Dionaea Venus, et Maronis est Aen. l. 3. v. 19. Sacra Dionaeae Matri. Ubi Venerem intelligi convenit: quam a Matre Dione sic dici, ait Servius. Ac similiter in illud Eclog. 9. v. 47.
Ecce Dionaei processit Caesaris astrum
Longe, inquit, repetitum est, a matre Veneris Dione: At longe repetitum non sit si Dione est Venus: inde autem Caesar dicatur, Dionaeus, quia genus duceret ab Aenea, Anchisae et Veneris filio. Et est pro hac sententia, quod nulli melius conveniat nomen Baaltis, quam Iunoni sive Lunae: nam, ut Iuppiter, h. e. Sol cum aethere, est Baal, ita Baaltis, Iuno, h. e. Luna cum aere, quasi Dominus dixeris. Quomodo et Reginam caeli appellat Ieremias c. 7. v. 18. etc. 44. v. 17. 18. 19. 20. uti Hebr. Malchah, quod muliebre. Licet enim et Solem Hebraei eôdem modô nuncupent, Semes, unde et David Kimchi, imo et Chaldaeus Paraphrastes intelligere hîc malunt Molochum, h. e. Saturnum, sive Iovem, h. e. Solem ipsum: Tamensententia haec eo minus probatur, quia Propheta loquitur de gentium idololatria; hisautem, in ipso Oriente, Solnon Dea, sed Deus habebatur. Unde dubium nonest, quin Sidoniis Baal et Astaroth distincta fuerint Numina, atquc illô Solem, hôc Lunam, denotârint: Astarte autem cum Baaltide eadem, vide Gerh. Ioh. Voss. de Orig. ac Progress. Idolol. l. 2. c. 21.

Hofmann J. Lexicon universale. 1698.

Share the article and excerpts

Direct link
Do a right-click on the link above
and select “Copy Link”

We are using cookies for the best presentation of our site. Continuing to use this site, you agree with this.